2Cor 8 | BEF | STEP | Nalalu'nigita, Masetonia hepatoga agoya hi emise bonatoga Hu'mamofihi he'mose'nauba lamana'a lu huto hu'ehina yamofihi lu lepilube.

2 Corinthians 8

Mono kumu lite efahi li nupa hilanamofihi ka'a

1 Nalalu'nigita, Masetonia hepatoga agoya hi emise bonatoga Hu'mamofihi he'mose'nauba lamana'a lu huto hu'ehina yamofihi lu lepilube. 2 Enali eniginaga fise gofana yamofihi komopa'agu minete salafa'a mine'ahanauba fa'menena lolo hinogo komopa'anigu sabiyana sipi huto lolo higo efahi li nupa hi'ahanamofihi nesi'a meni'ibe. 3 Nani enali hapa hapa'ani keheli bati huto keheli'ohuto nolube. Enali'ani enegekesa kehelite babahi hite enali efaha'ani epite amuya'anilo molo legege hite lagaso'a mone'i tite mine'ahana. 4 Nani enegekesa lito ya mehu'ohugo enali'ani kehelite logo'na hete Yutia kapogu Hu'mamofihi bona'amagihi komopa'ani bati hinogo kehelilana nasana li huto hite enele'mo bati hilana kefahi epilane lite loka heba heba hite li'ahana. 5 Ya nehite ana'ina nesi'a lolo hilune'mu nelafihe, luto nokehelugo ya hi'ahana yabe. Yata'a ya'ma Sipi Bomofitoga komopa'ani keheli emilete Hu'mau lilina malalina'a hilune lite lilete lalitoga hiti komopa'ani limilete mine'ahana. 6 Enali ya suhi hilago Taitasiu ya'ma lenali komopatini keheli bati hilana foya hapi fi'ehina ya'ma li su hoto lilibe luto yamofihi lu eto'ohuta yabe. 7 To keheli ule'ale hise'natini to Hu'mamofihi ka lu yege hose'natini to mono'i hapa'a keheli fe lite kehelise'natini to mono'mofihi foya'amu amuya molose'natini to lenemehatini epite lehe'mose'natini limilata nohina ya nasanamofihi legeya'a babu luto huto hu'ehina'mu yabe luto komopatigu keheli bati huse foya lilete kefahi li nupa hilana'mu ana hite keta mehuse hilabe luto nolube.

8 Nani lenogo'na bito melu'ohube. Mono ka nekehelina bona'magihi luga'aga ana foya'mu babahi hi'ahabe. Yamofihi lu lepinogo'ni lenali enehe'mose'na legege hite ya'ma huto ni'inamofihi hapa'a huto hilibe luto nolube. 9 Lenali Sipi Boti Yesu Kilisitohi lehe'mose'namofihi akehelilata nehanamo ni'ibe. Ai sekele mamu'amofihi afo'afu lenali kumu yabe luto muhi meni'ina bo lolo hu'ehina yamofihi lenali anatu mono'mofihi yogo fe'noho suhi hilabe luto ya suhi hu'ehinagi nani ya'ma lu nolepugo lenali giyaka lite ana hite bilabe.

10 To kaga mone ma luto keheli'ohuna lu lepinogo'ni keheliya ilenogo lamana'a huto hilibe. Lenali ya'ma tafa foya kanagu hapi fi'ahana ya'ma yatai li su halanamofihi bati hilube'mu hibe. Lenalitini yamofihi mele'isi kefahi li nupa hilune lite lilete keta mehuse hapi fi'ahanamo ni'ibe. 11 Ya hu'ehina'mu molo emite lelite nebite keta mehuse hite hapi mefi'ahanamofihi suhi hite keta mehuse hite li su halana ananamofihi legeya'a ya'ma nasana mele'ehilana legege'alo li huto hilabe. 12 Komopatinigu keheli bati hite kefa malalana ya'ma Hu'mau kehelinogo bati hilube'mu hibe. Lali memolo'ehiluta legegeto ni'igopa ana'ina molo'ohuta babeyafalo melenogoti Hu'mau bu gago bati hulata nohibe.

13 Enali luga'amagi lamana hite minenogo lenali sibina hite minalabe luto efahi li nupa hite epilo luto nolune meni'ibe. 14 Lenali yogo fe'nohi yatai kanagu enali salafa'a enoho lifilenogo ana'ina moneko legegetoko huto hilibe lu'ohunamo ni'ibe. To minoto kana mone yupahifi enali'ani yogo fe'nohuba lenalitoga kau'na kanagu ho lifinogo ya'ma moneko legegetoko mine melete minalabe. 15 Guna melete epiba epiba hilanamofihi ya'ma mono ka bukugu kaga'a ma huto ni'inamo ni'ibe:

Enali nose'na babu lite
li nupa hi'ahanamagihi enumu higo
mone he'mi'ahana'a meni'ibe.
To nesi'asi li nupa hi'ahana'amagi
mone kau'namu mefili'ahanamo ni'ibe.

16 Ya'ma Taitasiu lenali kumu luto lenehe'moto fifa ilata nohuna ana legegeto aitoga huto higo Hu'mamofihi fokehi holata nohune. 17 Lali lu emutogo keheli'ehibe luto liluta'a meni'ibe. Ai'a komopa'auba bati hinogo foya lenalitoga bilube'mu hibe. 18 Taitasi hiti to lalalutifu mone hiti etoho lufuna yabe. Ana bouba ka lamana'a lu yege holata nohinogo Hu'mamofihi bona'i asaga'i kehelite gi'a liyafa nehana yabe. Ai hiti Taitasi hiti etoho lufune. 19 Hu'mamofihi bona'a enali ana bomofi kumu komopa'anigu keheli bati hilana kefahi lelito buto enele'mo bati hinogo moneka bilabe lite le'mo mele'ahana. Ana foya ya'ma Sipi Bomofihi fana meha'a le'mo sipi hilibe luto to komopati babahi higo enehe'malube'mu nohune luto foya lilata nohuta yamofihi hapa'a huto hilibe luto ya'ma komopati epise foya lilata nohune.

20 Yamofihi laga mehina ka mone huto hu lalibe luto babu efahi ya'ma legeso hite kaba hila'ibe luto etoho lufugo neba'ibe. 21 Lali nasana lolo hutogo Sipi Bouba ai'asigo kehelinogo bati hilibe luto ni'igopa bona'magita ana hite kehelilenogo fotogo hilibe luto lilata nohune.

22 Lali ya'ma etali hiti lalalutifu mone'i hiti enoho lufutogo foiya nebabe. Ana bo ya'ma babu yupahi fi taga hu etoto bu go'ohuna amuya nasanamofihi hapa'a huto hu'ehibe. Yatai ya'ma lenali kumu keheligo ule'ale nohuto amuya babu luto nomalabe. 23 Taitasihi hapa'amu kehelilune lite nelinogomo lenali kumu yabe luto ai hiti nani hiti foya lilata nohu'ina botini loemo ya'ma nohu'ibe. To Taitasigi hiti moneka bila'ina bole'i lalalutigihi hapa'atiti kehelilune lite nelinogomo etali Hu'mamofihi ka nekehelina bona'atitimagi etoho lifigo foiya neba'ibe. To etali Kilisitohi fana meha'a le'mo saga hilata neha'ina bomale'i neha'ibe. 24 Lali lenali'i lenele'mo napa huto noluna yamofihi lamana'a huto hilibe lite lenali ana bona'i lenemehi epinogo Hu'mamofihi bona'magihi li gehesa'alo li gehesa'alo lenali keheliya ilabe.